وداع حبيبي
ودعت النص الشعرى
اللى بيفيض بمشاعرى
وبروحى وبأحاسيسى
أنا مش حاتنفس شعر
ولا حارتوى سطر حروفك
ولا حارمى خوفى ف طيفك
ولا حتقابل مع نجمك
ولا حتى حا دوب بين سحرك
ولا قلبى حيرتاح على صدرك
م اليوم
راح أخاصم الشفافية
ويا الإحساس المرهف
المرتاح جوه نقاؤه
وخيالى أنا حاطويه
أحلامى عقد مفرفط
بين سن القلم المحنى
متمرد وبيسمح لى
اصرخ وأبدل ورقى
أنا قلبى عاش يتمنى
الفارس والأحلام
ما خلاص اليأس اتأنى
ف العمر وف الأيام
وفقدت الأمل الأبيض
وركبت حصانى الأسود
الموت محاصرنى بشدة
وحاضنى بشوق وبحده
راكبانى جروح بتقطع
ف امبارح وف بكرة أتربع
على عرش ف صمت الموت
ولو أنى بحبك موت
بصماتك فيا تفوت
سايبه لى آثار على أسمى
وعلى قلبى وعلى تفكيرى
عاشقاك أنا جوه ضميرى
م اليوم
مش حاستكمل مشوارك
أبقى اترحم على قلبى
وعلى قلمى وعلى اشعارى
وإن كنت عايزنى أرجع لك
بدل ليلى
بنهارى
ليست هناك تعليقات:
إرسال تعليق