تنام الكلمة
ما بين لحظة ولادة
ولحظة موت
حياة بتفوت
وتتكون
يمامة بترسي ع الشاطئ
بتتنهد وتتكلم
بتفرح أو بتتألم
بتتعلم وتتهجى أمور الطير
صباح الخير
بيصحى الصمت
تدب حياة ف أنفاسه
يدون حرف كراسه
وتبقى الذكرى أجراسه
يميل الخيط تجاه طرفه
يكون دايرة
يحزمها ويحميها
فتتعلق ف دنيا الحلم
وتتلملم وتتحاور
وتستسلم لصفو الروح
يدور الود بين الدم
ويتلاقى ف ركن القلب
وشوق الهم
وهى حياة
يا تغرق فى بحور ليلها
يا أما تلقى أيد تسند
وتبقى نجاة
وتكبر وسط معاركها
تمر سنين تعاركها
تدوق البعد
تدوب ف القرب
وشرق وغرب
تكون الشمس
بين ناسها
وفارسها ودارسها
وحارسها
ولكن تيجى لحظتها
حياة بتفوت
تنام الكلمة
تبقى سكوت
ف لحظة صمت
لحظة موت
لحظة موت
ليست هناك تعليقات:
إرسال تعليق