أنا صبية
آه واخدانى الليالى
آه لهيانى السنين
وأنا مش واخده بالى
بقى سنى أربعين
استغربت الحقيقة
واسترجعت اللى فات
لسه إحساسى مرهف
الحلم هو هو
وخيالى وأمنيات
باستنى طموح ودنيا
وكأن ف طرف ثانيه
حاعيش ف عمر تانى
مكتوب لى من زمانى
وقلب يساع وجودى
فياض صدق وحنان
وملاك بالخير ينادى
الجنة دى باسمك
على بابها سطر فعلك
والنيه والإيمان
أرجع لمرايتي تانى
القى صبيه بضفاير
والحب فى جسمى فاير
والشوق بالفرحة طاير
والروح بتلقائية
والضحكة باقية فيّا
ببساطة
وبعفوية
بتقول لا مش حقيقة
أنا لسه من دقيقة
كنت شابه وصبية
ومشاعرى لسه دافيه
عامره بحب وشقيه
ف ملامحى الجاذبية
وفكرة وانطلاقة
باقية جوايا طاقة
وطبيعتى هى هى
سنين مرت عليّا
ماخدتش
رأيى فيها
دايره ولا حاسة بيها
أتحاسب ليه عليها
وتقولوا
شعرى شاب
إيه يعنى لونه أبيض
ما أنا قلبى لسه أبيض
وأجمل شئ باحبه
ف الدنيا الورد الأبيض
والبحر بموجه الأبيض
ولون السما
والسحاب
إيه يعنى شعرى شاب
لسه قلبى شباب
وحاعيش
بكرة وبعده
مش حاقبل الانسحاب
أو يهزمنى العتاب
النيا بخيرها ليّا
والكلمة الحلوة هى
وإرادتى باقية فيّا
شايه وبروح عفيه
حاعيش
وأموت صبية
إيه يعنى شعرى شاب
قلبى لسه شباب
ليست هناك تعليقات:
إرسال تعليق